نئی دہلی،27؍فروری(ایس او نیوز/ ایجنسی) اشتعال انگیز اور نفرت آمیز تقریر کا معاملہ جمعرات کو سپریم کورٹ پہنچا۔ بی جے پی لیڈر اشونی کمار اپادھیائے نے عرضی دائر کی ہے۔اس درخواست میں مبینہ نفرت اور اشتعال انگیز تقریر پر لاء کمیشن کی رپورٹ کو فوری طور پر نافذکرنے کی ہدایت جاری کرنے کی کورٹ سے درخواست کی گئی ہے۔اپادھیائے نے نفرت آمیز تقریر پر طریقہ کارکمیشن کی 267 ویں رپورٹ کو نافذ کرنے کا مطالبہ کیا ہے۔
دراصل سال 2017 میں لاء کمیشن نے نفرت اور اشتعال انگیز تقریر کی وضاحت کی تھی۔ سپریم کورٹ کی ہدایت پر، تعزیرات ہند (آئی پی سی ) اور مجرمانہ عمل ضابطہ اخلاق (سی آر پی سی ) میں دفعہ 153 سی اور 505 اے کو شامل کرنے کا مشورہ دیا تھا۔اس سے پہلے، قومی دارالحکومت میں کچھ جگہوں پر ہوئے تشدد کو روکنے میں ناکام رہنے پر دہلی ہائی کورٹ نے دہلی پولیس کو پھٹکار لگائی تھی۔اس دوران کورٹ میں بی جے پی لیڈروں کی تقریروں کو دکھایا گیا تھا۔
کورٹ نے دہلی پولیس کو بی جے پی لیڈر کپل مشرا، مرکزی وزیر انوراگ ٹھاکر، ایم پی پرویش ورما سمیت دیگر کے خلاف مقدمہ درج کرنے پر جمعرات کی شام تک فیصلہ سازی کو کہا تھا۔اس کے بعد دہلی تشدد کیس کی سماعت کر رہے جسٹس ایس مرلیدھر کا پنجاب ہریانہ ہائی کورٹ ٹرانسفر کر دیا گیا۔
تشدد کیس کی سماعت کر رہے جسٹس ایس مرلیدھر کے ٹرانسفر کو لے کر بی جے پی اور کانگریس کے درمیان زبانی جنگ شروع ہو گئی ہے۔راؤ کا ٹرانسفر دہلی ہائی کورٹ سے پنجاب ہریانہ ہائی کورٹ کر دیا گیا ہے۔اس پر کانگریس کے ترجمان رندیپ سرجیوالا نے کہا کہ کیا فیصلہ کرنے والوں کو بھی بخشا نہیں جائے گا؟
انہوں نے کہاکہ 26فروری 2020 کو دہلی ہائی کورٹ کے جسٹس مرلیدھر اور جسٹس تلونت سنگھ کی دو جج کی بنچ نے فساد بھڑکانے میں کچھ بی جے پی لیڈروں کے کردار کو پہچان کران کے خلاف سخت حکم جاری کئے اور پولیس کو قانون کے تحت فوری طور پر کارروائی کرنے کا حکم دیا تھا۔ٹرانسفر کے معاملے پر گھری بی جے پی حکومت نے جمعرات کو صفائی دی ہے۔
وزیر قانون روی شنکر پرساد نے کہا کہ سپریم کورٹ کے کالیجیم نے چیف جسٹس کی سربراہی میں 12 فروری کو ہی ان تبادلے کی سفارش کر دی تھی۔کسی بھی جج کے ٹرانسفر پر ان کی بھی رضامندی لی جاتی ہے اور اس پر بھی عمل کیا گیا ہے۔اس مسئلے کا سیاست کرکے کانگریس نے ایک بار پھر عدلیہ کے تئیں اپنی بدنیتی کو دکھایا ہے۔